II-Хомустахская сельская библиотека

Алтынньы 30 күнүгэр “Сэргэлэх” сынньалаҥ кииҥҥэ “Алгыс” аҕам саастаах түмсүү уонна олохтоох киин библиотека, култуура үлэһиттэрин көҕүлээһиннэринэн ыаллыы сытар Уус-Алдан нэһилиэктэрин Баатаҕай уонна Тумул комсомолецтарын ыҥыран Комсомол төрүттэммит күнэ өрө көтөҕүллүүлээхтик ыытылынна. Дьыл-хонук ааһан истэҕин аайытын билиҥҥи аҕам саастаах көлүөнэ үлэлээн ааспыт кэрчик кэмин күндүтүк саныыр.

Комсомол мөлүйүөнүнэн уолаттарга уонна кыргыттарга улахан олоххо путевка биэрбит тэрилтэ быһыытынан өйдөбүллээх хаалбыт. Кини ыччаты иитиигэ киллэрбит кылаата тугунан да кэмнэммэт.

Ыччат Бүтүн Сойуустааҕы Ленинскэй Коммунистическай Сойууһа (ЫБСЛКС), ол эбэтэр Комсомол, 1918 с. алтынньы 29 күнүттэн — 1991 с. сэтинньи 6 күнүгэр диэри үлэлээбитэ. 14-28 саастаах бастыҥ үөрэхтээх, үлэлээх ыччат киирэр уопсастыбаннай тэрилтэтэ сэбиэскэй көлүөнэ дьон сүрэҕэр чугас. Кинилэр сырдыкка угуйбут, үтүөҕэ сирдээбит Комсомол Албан аатыгар сүгүрүйэллэр. Гражданскай уонна Аҕа дойду сэрииилэрин дьоруойдарын бойобуой суоллара, хорсун-хоодуот быһыылара үтүө холобур буолан ыччаты дойдуга бэриниилээх, эппит тылы кэспэт, албыннаабат, уорбат-талаабат, ыарахантан чаҕыйбат, кыраҕа-кыаммакка көмөлөһөр эйэҕэс майгылаах буоларга иитэллэрэ, ыраас, сырдык санаалаах, кэскиллээҕи ыралыыр дьон буолан тахсарга олук уураллара.

«Эн, Комсомол – мин дьолум!» тэрээһин торжественнай чааһыгар комсомоллар монтаж аахтылар, музыкальнай эҕэрдэлэрин тиэртилэр. Баатаҕай нэһилиэгин   библиотекара Августина Пермякова библиотекарьдарга «Республика чулуу дьоно» — Николай Тарскай кинигэтин бэлэхтээтэ.

Олохтоох библиотекарь Елена Слепцова ыыппыт «Өркөн өй» биктэриинэтигэр 1970-1980 сыллардааҕы комсомолецтар илин-кэлин түһүстүлэр. Дьүүллүүр сүбэ быһаарыытынан Тумул «Төлөн» комсомольскай бөлөҕө — 1 м., Баатаҕай нэһилиэгин хамаандата — 2 м., 2 Хомустаах хамаандата 3 м. ыллылар.

Тумул «Төлөн» комсомольскай бөлөҕө истиэнэ хаһыатын, комсомол кинигэлэрин, оччотооҕу Ленинскэй комсомол значоктарын коллекциятын, комсомол атрибутикатын быыстапкатын туруордулар. Комсомоллар салгыы спортивнай күрэхтэргэ: дартска, корнхолга, эстафетаҕа олус көхтөөхтүк кытыннылар. Түмүккэ: 2 Хомустах — 1 м., Баатаҕай-2 м., Тумул-3 м. буоллулар. Хамаандаларга грамоталар, өйдөбүнньүк бэлэхтэр туттарылыннылар. Бу тэрээһиҥҥэ ыраахтан кэлэн кыттыбыт  ыалдьыттарга махтанан туран, баһылыкпыт солбуйааччыта Сергей Никонов  нэһилиэк библиотекаларыгар 2 Хомустах краеведческай-историческай кинигэтин бэлэхтээтэ. Сынньалаҥҥа көхтөөх оонньуулар, үҥкүү-битии буолла. Кыайыылаахтарга бэлэхтэр туттарылыннылар. Тэрээһин кэнниттэн олохтоох библиотекаҕа, нэһилиэк музейыгар экскурсия буолла. Кыайыы скверигэр «Аалай уоттаах чүмэчим» диэн Кыайыы 80 сылынан өйдөбүнньүк чүмэчи уматан уурулунна. Кэлбит ыалдьыттар тэрээһинтэн астынан, үөрэн-көтөн тарҕастылар.