II-Хомустахская сельская библиотека

Муус устар 14 күнүгэр Хомустаах 2-с нэһилиэгэр Улуу Кыайыы 80 сылынан, нэһилиэккэ Улуу Кыайыы уонна көлүөнэлэр ситимнэрин сылыгар аналлаах “БАРЫТА  КЫАЙЫЫ ТУҺУГАР» диэн  тыылга кыайыыны уһансыбыт, дьоммут сырдык ааттарыгар сүгүрүйэн, сэрии ыар сылларыгар балыктаан, оҕуруот аһын үүннэрэн, бар дьоннорун аһаппыт үтүөлээх дьоммут Олесов Иван Васильевич, Леонтьев Егор Павлович, Кван-Эн-Чу Николай Дмитриевич сырдык кэриэстэригэр аналлаах көрсүһүү буолан ааста. Өйдөбүнньүк тэрээһиҥҥэ кинилэр оҕолоро, сиэннэрэ кэлэн кыттыыны ыллылар: Габышева Мария Николаевна -СӨ норуотун хаһаайыстыбатын үтүөлээх үлэһитэ, Нам улууһун уонна Хомустаах 2-с нэһилиэгин Бочуоттаах киһитэ, Амонова Анна Романовна -Россия үтүөлээх  маастар повара, Нам остолобуойугар, Дьокуускай куорат Тыгын Дархан рестораныгар  үлэлээбитэ, Леонтьева Александра  Дмитриевна-СР маастар повара, РФ потреб кооперациятын үтүөлээх үлэһитэ  уонна кини кыыһа Лена Егоровна. Ол курдук сэрии иннинээҕи сыллартан саҕалаан тыа сиригэр оҕуруот аһын, хортуоппуйу үүннэрии киэҥник ыытыллыбыта. Мария Николаевна Габышева аҕата Кван-Эн-Чу Николай Дмитриевич  кэлэн олохтоох нэһилиэнньэни оҕуруот аһын ыһарга үөрэппит улахан өҥөлөөх. Биһиги  нэһилиэккэ Эбэҕэ бастакынан оҕуруот аһын ыһыынан дьарыктаммыт Протопопов Захар Данилович этэ. Фроҥҥа анаан хас холкуос аайы балыгы  бултаан государствоҕа туттарарга былаан кэлэрэ. Нэһилиэкпитигэр  балыксыттар биригээдэлэрэ тэриллибитэ. Биригэдьиирдэр Олесов И.В, Леонтьев Е.П. фроҥҥа балыктааһын сорудаҕын толорон РСФСР туйгун балыксыта диэн знагынан уонна харчынан бириэмийэлэммиттэрэ. Кинилэр сырдык ааттарыгар сүгүрүйэн,кэриэстээн оскуола оҕолоругар “Көмүс хатырыктаах-дойдум собото” диэн оскуола үөрэнээччилэригэр куонкурус биллэрбиппит. Ол түмүгүнэн: Алын сүһүөх үөрэнээччилэригэр (1-4) илиинэн оноһукка Собо балыкка Кыайыылааҕынан таҕыстылар. 1м- Гермогенова Ева 4 кыл,2м- Ширяев Сахамин уонна Дьулусхан 4 кыл. 3м- Находкин Алгыстан 3 кыл. Орто сүһүөххэ макет проега: 5 кыл-Мунха, 6 кыл-Куйуур, 7 кыл- балык ас көрүҥэ- кыайыылааҕынан таҕыста 1м-6 кыл, 2 м-7 кыл. Үрдүкү сүһүөххэ (8 -10 кыл)  “Дьэллик Элэмэс-дойдум хоһуун ата” хоһуйан онорууга: 1м — 8 кыл, 2м-10 кылаас. Кыайыылаахтар грамотанан, бирииһинэн наҕараадаланнылар, кыттыбыт бары оҕолорго сертификат уонна поощерительнай бириистэр туттарылыннылар. Сэрии сут-кураан кэмигэр бар дьоннорун үрүҥ тыыннарын өллөйдөөбүт дьоммут туһунан кинилэр оҕолоро, сиэннэрэ дьоннорун аатын олохтоох эдэр ыччат үйэ-саас тухары умнубакка кэриэстии сылдьалларын туһугар олус иһирэх кэпсэтиилээх үтүө тэрээһин буолла.